الاحتفال مش ممنوع (إلي أ.م.)
لو كنت فاكر وجودك هنا خلي الاحتفال ممنوع
فاحب أقول لك احتفالنا بيك السنة دي غير
ركز معايا هاتلقي صوت الغنا مسموع
قلوب كتير حواليك داعية لك بكل الخير
ركز كمان يا حُر ميِّز صوت الحبايب
آدي صوت حبيبتك أهو ولا ألف باب يمنعه
بتغنيلك بصوت مِ الشتياق دايب
همسه يرج الحيطان وما في غيرك يسمعه
ركز كمان وكمان اسمع لصوت أهلك
غنا مع دعاء لله وضحكة مصاحبها دموع
لكن دموع فرحة بحرية هاترجعلك
خلت حديد السجن نوَّر كأنه شموع
وصاحبك هنا جنبك مع إنه مش طايقك
ومن بدري مش عايز يشوفك هنا تاني
لكن في يوم عيدك من قلبه بيقول لك
بكرة الفرج ييجي ولا يوم تاني تعاني
في عيد ميلاد أ.م.
ديسمبر ٢٠٢٠ طرة
https://soundcloud.app.goo.gl/SxEAY