كلام ‏فارغ

  صحبة كبيرة واتجمعت من غير سبب يومــاتي لمة علي كل لون ليها العجب قريـب غريـب علي جـــار وصــاحب كـأنه مـولـد ومـافيــش حـد غـــــــايب الصبح ضحك والضهر لعب وفي جـد بــس مش كـل مرة أفكــار وشك وبالليـــل نحـب وتــاني يــوم نعيــدهــــا كَرَّة الصبح ضحك والضهر لعب وبالليـــل نحــــــب وهلم جَرَّا ف ليــلة الصحبــة اتجمعـــت مـن كـل حتة الكل حاضر ومافيش مكان ع الأرض حتي مش بس الكراسي والكنب السهرة كانت مسرحيـــــة كوميديَّة وضحك للركـــب مشاريب تسالي فشار ولب والفــاكهة تين وشوية عنب الفصل الأول ابتدي بأغنية آخر بهججة تصقيـــف تـــلاقي مـــع دندنة واللي اندمـــــج واداها رقص مشــاهــد مكتــوبــة بسلطنــة مافيــش رقابة مافيــش مقص والضحك صوته عمال بيعلي طــالع م القــلب يشفي التعب وفصل تاني زي اللي فاته ويمكن اكتر الضحك زاد من ايفيهاته والكل كركر وكالعادة أول ماتزيد الاثارة لزوم الاستراحة قفلوا الستارة الضحك ماعادش صوته عالي وخلص كمان طبق التسالي من غير سلام واحد ورا واحد انسحب الكل قام وكأنه اتفاق علي الهرب اتبقي واحد...

شجر ممدود من تحته جِدر في أرض بور مسقية فُجر عدت سنين ماطلعله زهر كل اللي باقي كام ورقة صُفر ماعدش صبر ماعدش صبر والحل مُر الحل بتر ويتغرس في أي أرض تانية قهر جايز يِخْضَر سبتمبر 2022 https://soundcloud.com/bassems/mdlg5hyk2smf?in=bassems/sets/1jzmi2nxvs9q

سيما أونطة  واحد عزمني علي فيلم من غير تذكرة وقبلت العزومة غصب عني مافيش اختيار قاعة زحمة موت وكل الوشوش مكشرة سألت اللي جابني .. الفيلم غم ولا ايه؟ شاور علي كرسي محجوز باسمي أقعد هنا ده كرسي واحد! مش هانتفرج سوا؟ أنا شفته قبلك أقعد .. هاروح أجيب فشار وف لحظة اختفي والنور طفي والفيلم ابتدا بشاشة سودا مكتوب عليها شوية كلام في الفلسفة وخبط لزق مشاهد كتير ورا بعضها مليانة دوشة وبتتقطع من نصها مافيش سيناريو أو حوار لسه باقول أكيد دي فرشة لزوم البداية وهاتيجي وراها حبكة أولي وحبكة تانية قبل ذروة الانفجار لقيت شاشة سودا مكتوب عليها النهاية فسألت نفسي يا تري في جزء تاني؟ ولا أروح أجيب فشار إبريل 2022 https://soundcloud.com/bassems/ggyw4n29grun?in=bassems/sets/1jzmi2nxvs9q

قاعد لوحده ورا ميت سياج م الفكر مخه جاله ارتجاج صاحب عمال يشده شد علشان يفوق يتربس دماغه بحديد وصاج وشقيق يحاوطه بالحنان ماهو دم واحد في العروق ما يلاقي منه غير احتجاج وحبيب يجيله مادد له إيده بالعلاج وان طال يشيله فوق راسه تاج لا يحس بيه ولا يدق قلبه م الابتهاج ورغم انه ليهم كلهم في أمس عوزة واحتياج الرد دايماً هو هو ماليش مزاج ماليش مزاج https://soundcloud.com/bassems/iszmztl4rxwd

في السكة ماشي والدنيا ليل مافيهوش قمر لقيت في وشي صفيحة زبالة سادَّة الطريق ايه اللي جابني من ده شارع اختارته انا ولا القدر الغطا مفتوح وعفن بيفوح خلي النفس عمال يضيق كتمت نفسي وطلعت أمد بدال ما اتخنق لقيت الصفيحة بتعترضني وبدأت اتزنق فجأة الصفيحة قالتلي حاسب مانتاش معدي تنحت وفضلت مبلم صفيحة زبالة بتتكلم وانا في اندهاشي فضلت تقول كلام كتير ولا في الخيال عن الحرام وعن الحلال والصلاة والابتهال والفضيلة والرذيلة والانحراف والانحلال ماقدرتش أمسك ضحكتي فاسبتها وحاولت أعدي مانتاش معدي من غير رسوم وبعملة صعبة بالدولار أو بالريال يا مدام صفيحة ماتأخذينيش الريحة فايحة والصبر طال في غيرك أولي بالكلام ده كفاية نصب واحتيال بركان م الصفيحة وانفجر والقذارة صبحت مطر ينهال عليَّ م اليمين ينهال عليَّ م الشمال وسيل م الزبالة وانهمر أخدت نفس مليان عفن فوق الاحتمال وقدرت أعدي ولسه يادوب بشم نفسي لقيت قصادي مقلب زبالة معتبر ديسمبر ٢٠٢١ https://soundcloud.com/bassems/lt86rjvzpfvc?in=bassems/sets/1jzmi2nxvs9q

عزيزي العزيز كيس الجوافة هاقولك كلام في غاية السخافة ولو إني عارف هاتسيبني اهاتي وتفك مني بصنعة لطافة لكن وماله هاقول واعيد وافضل أزيد جايز في مرة يجيلك كلامي ولو من بعيد ما انا لازم أقول مالقيتش فايدة من سكاتي وع الودان هاديها زن يمكن يفيد قبل أما نطلع عليك القرافة عزيزي العزيز كيس الجوافة يؤسفني اقولك بقي شكلك وحش قفاك ورم وردك سكوت وكل يوم تلبس خازوق في ديل خازوق وجواك يفوت مبسوط وعامل صاحب قرارك وضحكة سمجة مالية وشك تتجاب يمين تتجاب شمال يحطوك في درج ولا في تابوت جلدك تخين ومادة خام للجلافة عزيزي العزيز كيس الجوافة ولما أواجهك تقول مش لوحدي الأكياس كتير مش غلطتي وترد بكل عنطزة مايهمنيش الدنيا تحت جزمتي هادي وكيوت مع اللي مكيسك وتعمل أسد علي أي كيس زيك تمام وان صوتك طلع يطلع عشان فخر العرب قال حط جون في المان سيتي عامل طناش في أي جد وواخدها جد في الهيافة عزيزي العزيز كيس الجوافة نوفمبر ٢٠٢١ https://soundcloud.com/bassems/cpomf93kiqss?in=bassems/sets/1jzmi2nxvs9q