اعتذارات متأخرة - اعتذار رقم ٥: آسف يا ورد
في طريقي زي العادة
جوايا نفس الإحساس
وكأني هاقولها لأول مرة
مع إني تملي بقولها له
القلب تزيد دقاته فيرد
هاتقولها إزاي من غير الورد
ده عبيره أشواق تنطق بالهمس
لمسات مرسومة بحروف من ماس
حبات الندي علي أوراقه
أحضان بتدفي في عز البرد
يقابلني بتاع الورد بضحكة
شاور علي ساعته وقال في معادك
الصحبة لمين المرة دي
قبل ما أجاوب قال لي أنا عارف
أنا بس بحب أسمع ردك
قلت له ليَّ ما هو أنا
وقبل ما يسأل بمناسبة إيه
قلت عينيا تشوفه مناسبة
سيبني أختار الورد بإيدي
ده أنا بيني وبين الورد كلام
سلوفان شفاف زي العادة
وشريطة بسيطة من غير تكليف
كده كله تمام طب ياللا سلام
يوم ولا اتنين وأشوفك تاني
وفي يوم من بعد كتير غيبة
يقابلني بتاع الورد بلهفة
فينك حصل ايه طمني عليك
أبداً حال الدنيا تلاهي
طب أقعد وارتاح طلبك جاهز
تسلم شوف انت زباينك
أنا أصلي مافيش عندي مناسبة
أنا جاي أفضفض لأصحابي
بصيت للورد ومش عارف
أحكيله إزاي ع اللي حصل لي
قبل أما أنطق قال لي أنا آسف
وأنا مستغرب قام كمل لي
باين في عينيك كل اللي جري
شكلي ماوفيتش معاك الوعد
قلت له بالعكس
هو ما سمعكش
هو اللي مافهمش كلامك ولا يوم حسك
وماخدش منك غير شكلك
أول ماتدبل أوراقك يفضي مكانك
ده مايستاهلكش
أنا اللي خليتك عادي
أنا اللي رخصتك وانت الغالي
أرجوك تسامحني أنا الغلطان
آسف يا ورد
أكتوبر ٢٠٢٠ - طرة
https://soundcloud.app.goo.gl/7FDeQ