مسجون ريتز كارلتون
أنا المسجون مش إنتوا .. ومع ذلك
مطلوب مني أطمنكوا .. ولذلك
خد عندك
قال بيقولوا علينا مساجين
ده هنا حرية مالهاش سقف
والخدمات مافي منها اتنين
معاملة رقيقة في غاية اللطف
الأجواء مرشوشة معطر
ونضافة شئ مش معقول
حمام فوق الوصف يحير
حتي السقف ممسوح بديتول
الزنازين مفروشة حرير
والأبواب مفتوحة عَ الآخر
والترفيه في منه كتير
ماتشات كورة وفقرة ساحر
يوم بنروح عند العجلاتي
والتأجير طبعاً مجاناً
الظباط والأمنا يوماتي
بيلاعبونا بلاي ستيشن
والمستشفي كأنه أوتيل
سيفين ستارز ويمكن أكتر
لو حسيت بصداع بالليل
كونسولتو يجيك قبل أما تفكر
أما الأكل بوفيه مفتوح
وشيفات من مطابخ العالم
حتي اللي بالك مسموح
في جو رومانسي وهادي وحالم
بيترجونا نروح بيتنا
طب ونسيب ده كله لمين
اتطمنتوا كده علي عيشتنا
بس بلاش تدونا عين
يناير ٢٠٢١ - طرة
https://soundcloud.app.goo.gl/Vwmoz