كابوس ١ : صلح شوط
عارف كوابيس العصرية لما تلاقي الكون مقلوب
هاحكيلك علي واحد منهم أتمني يكون تكفير لذنوب
سلم عالي في ميدان واسع وأنا طالع بجري عليه بسرعة
آخر السلم دنيا جميلة، خضرة وشموسة يادوب طالعة
قبل أما أوصل بمافيش درجة يظهر كائن سادد السكة
بسماجة ضحك وعمل بيبي عَ السلم حوله بركة
وأنا بتزحلق شفته بيحرق في الخضرة وطفي الشموسة
واتقسم الكائن ييجي مية كائن وانتشروا في أرض المحروسة
كائنات بملامح ممسوخة اللون والشكل بيتغير حسب النية
دقن طويلة ولابسين بيريهات وبدلة بعلامات علي جلابية
وفضلت أغرق وأغرق وأغرق في البركة وصلت لحد القاع
لقيت فريقين عاملين ملعب جماهير وخطط هجوم ودفاع
وراس انسان معمولة كورة سنتر باصي صلح شوط
تم التصليح هاتوا راس غيرها سنتر باصي صلح شوط
كائن ورا كائن جُم في صفوف بيتابعوا سير العملية
لمحوني فشاوروا هاتوا راسه حاولت أجري اتلموا عليَّ
صوتهم زمجر والشكل اتغير في ثواني واتحولوا ترسانة حربية
خلعوا هدومي وغموا عينيا وكلبشوا إيدي كلبشة خلفية
وخدوني عَ الملعب والجماهير لسه بتهتف علي نفس الصوت
سنتر باصي صلح شوط سنتر باصي صلح شوط
في نص الملعب ربطوني واترصوا يميني وشمالي صفين اتنين
الأول زود علامات فوق اكتافه والتاني دقنه زادت شبرين
الأول صوب أسلحته
والتاني أشهرلي سيوفه
وفي وسط ده كله لقيتني بقول وبصوت عالي رج الملعب
بكرة تشوفوا .. بكرة تشوفوا
يناير ٢٠٢١ - طرة
https://soundcloud.app.goo.gl/KzsSB