اعتذارات متأخرة - اعتذار رقم ٤: آسف يا ديني
يا دين أهلي .. يا دين أمي .. يا ديني
أواسيك ولا تواسيني
ع اللي باسمك مافي وراهم غير يراقبوني
ناسيين يراقبوا روحهم فاكرين يحاكموني
ياما سمعت لناس بتسب تلعن فيهم
ويكفروني واقول ايه يعني خليهم
الحظ لعب لعبته ورماني وسطيهم
خلاني اشوف من قرب كل بلاويهم
آن الأوان أرفع راسي مِ الرملة
ولو كفروني زيادة وعملوا مية حملة
آن الأوان أنطق من كتر غيرتي عليك
من فجر أفعالهم بيسيئوا ليَّ وليك
يا دين أهلي .. يا دين أمي .. يا ديني
أواسيك ولا تواسيني
ده جهل وله رجلين ماشي يبرطع بيهم
راكبينه ومبايعين ومدلدلين رجليهم
وشيوخ منسر وراهم بالأمر بتمشيهم
وسياسة سايقة الكل بالفتنة تعلف فيهم
راكبين في آلة زمن راجعة سنين ضوئية
ويجادلوا في مسائل معروفة بديهية
واحد يقول الأرض مفرودة مكوية
ويقيم عليك الحد لو قلت كروية
مدعين معرفة مابيغلطوش غلطة
عايز تناقشهم حاسب من الجلطة
هاتجيب دليل علمي هايقول أنا أعلم
ده العلم خدعة كبيرة اسمع بقي وافهم
دي مؤامرة كونية يهودية صليبية
شيعية علمانية وماسونية عالمية
علي فول وطعمية وهدفها هدم الدين
أصل احنا احسن منهم علشان كده خايفين
ومسخرين الجن وسحرهم أسود
رابطين عمل سفلي في جناح غراب أبيض
مدفون في سابع أرض لكننا صاحيين
سيوفنا مسنونة سننحر رقابهم نحر
أمتنا لن تركع ستسيل دماهم بحر
أموالهم غنائمنا ونسائهم سبايانا
هذا جزاء الكفر
حي علي الجهاد
تكبير
رفعت رايات النصر
يا دين أهلي .. يا دين أمي .. يا ديني
أواسيك ولا تواسيني
دايرين يحاكموا الخلق ده كافر وده مؤمن
ودخول الجماعة بختم لما الإمام يأذن
لا والكوميديا كمان بيكفروا بعضهم
ييجي اربعين فرقة مقسمين نفسهم
إخوان أنصار كتايب أجناد ودولة وحسم
وكل فريق فاكر ربي ناداه بالإسم
وحتي لما ينادي أدان يجمعنا
يقولوا مانصليش مع كفرة مش منَّا
دي أول خطايا الكون لما الشيطان اتكبر
والكبر فيهم طبع خلي الشيطان متحير
يا دين أهلي .. يا دين أمي .. يا ديني
أواسيك ولا تواسيني
ع اللي ما شاف في الست غير فتنة ليها اللعاب بيسيل
سلعة بتسعيرة للخدمة ونوم الليل
دي حتة لو طفلة بضفيرة ست سنين
ومافيش في بالها غير عرايسها والبلالين
شخلل كيسك وشيل جواري ملك يمين
والسعر علي كيفك وفي عرض عَ الاتنين
جيبوتية بتلاتة صومالية في بألفين
سورية متجربة طوع إيدك تسر العين
لو عايز عيون خضرا عليك وعَ الشيشان
أخوات وارد بره في الشغل حاجة جنان
ده بتاع طالع له دقن واقف لها زنهار
صوتها ان طلع عورة محبوسة جوه الدار
واسمها نكرة معدود من الأسرار
ومكانها في الآخرة معروف في أهل النار
مايسيل لعابه لغيرها إلا لحلل سخنة
مليانة فتة وهبر بتزود التخمة
يرقد علي فرشته يلغ ويتفتف
ودهون الهبر تسرح فيبتدي يألف
ويفسر التفاسير ويقص ويخيط
يفصل شريعة مقاسه لمزاجه تتزبط
يا دين أهلي .. يا دين أمي .. يا ديني
أواسيك ولا تواسيني
ع اللي محرم عيشتي أفكاري تفانيني
رواياتي وخواطري ريشتي وألواني
وكتاب في مكتبتي يشطب يقطع فيه
عامل مقص رقابة ولو طال يقص لساني
بكار وميكي حرام
دول أصلهم أصنام
في الآخرة يجروا وراك
والسينما والأفلام
والحلم لما تنام
عذاب بيستناك
وتجيله حالة ان سمع يا ليلي يا عيني
فيختم عليَّ بختمه وعَ النار يوديني
ربي خلقني مبدع ميزني بدماغي ووصاني أشغلها
مايهمني ختمك ماتهزني سيوفك إطلع يا شيخ منها
آسف يا ديني سكت واديتلهم فرصة يتكلموا باسمك
سكوتي كان علشان طول عمري مصدق فيك مافيش حاجة تهزك
هايروحوا زي ما جم وهايفضل الإنسان علي فطرته الأولي
مايحب لون الدم والكره والفتنة وحروب غبية طويلة
يا ديني أنا عارفك ومعاك لحد الآخر وده عهد ما بينَّا
ده مافي دين عَ الأرض شريعته غير الحب في الفرض والسنة
فبراير ٢٠٢١ - طرة
https://soundcloud.app.goo.gl/tzH3c