تأبين

شد حيلك اجمد واصبر .. كنت خايف لتقولهالي

أصل المحنة من شدتها خلت كل الناس جايالي

ناس أعرفها ناس ماعرفهاش ناس مِ الشرق وناس مِ الغرب

ناس بتشد الأزر بكلمة وناس تانيين حاسين بالذنب

ناس شمتانة وناس ندمانة وناس تدعيلي من جوه القلب

كله اتجمع مادد إيده حتي اللي اتسببوا في الكرب

شد حيلك اجمد واصبر

كنت خايف لتقولهالي والاقيك بسلام بتمد ايديك

عامل أي حساب للشدة وأطلع غلطان متجني عليك

وأتاري الخوف مش في محله اثبت علي وضعك كده خليك

شد حيلك اجمد واصبر 

كنت خايف لتقولهالي وألقيني مضطر أقول متشكر

فتسوء فيها زي عوايدك وبسيف الحيا تاخد أكتر

بحمد ربنا أهي جات منك والصفحة اتقلبت وختمت عليها بشمع أحمر

وعموماً المحنة أهي عدت شديت حيلي وقدرت أصبر

من غير لا سلام لا كلام منك انت وأمثالك المنظر

وصحيح كانت أيام صعبة ماقدرش أنكر

لكن قوتني واديتني أصحاب واحباب فوق ما اتصور 

إوعي تفكر

إوعي تفكر إنه عتاب أو مستنيك تيجي تبرر

ده أنا جاي أعزي في تأبينك إنما متأخر

فبراير ٢٠٢١ - طرة

https://soundcloud.app.goo.gl/LfQaN