نص عين
زيادة عن سنة صاحي بانام وعينيا مفتوحة
في راسي خناقات ودوشة وآهات من كتر زعيقها مبحوحة
وأنام إزاي علي فرشة نسيجها من قلق يوجع
وأنام إزاي وجسمي عليه بيتقلب في يأس إن البراح يرجع
وأنام إزاي وأنا ملفوف بالخوف غطا بيرعب يخلي الروح تطلع
وأنام إزاي ودماغي بيجيب ويودي في كلام خلاص ما عاد ينفع
دي دوامة
دوامة حديد وحبساني وبعداني عن الأحباب
يا نوم أرجوك تعالي ان شالله لثواني وخلي الحلم يفتح باب
واشوفني حر وبجري عليهم أحضنهم
يا نوم اصبر ثواني كمان مالحقتش اعرف أخبارهم
خلاص أنا بكرة هستناك يارب يستنوني همَّ كمان
وبكرة يفوت وبعده يفوت وليل ورا ليل وأنا سهران
ماجاش النوم وسابني لأفكاري اللي ماتطمن
بقالي كتير ماغمضتش ونفسي بجد أنام جداً
فبراير ٢٠٢١ - طرة
https://soundcloud.app.goo.gl/H4xsM