كابوس ٢ : زيارة ميري
انا ميت ولا حي .. إن كان كابوس صحيني
بيقولوا سجن وأنا شايفه قبر وفي كل عيد تيجي تزوريني
الوقت طال لكني لسه رافض أصدق .. دي مش حياتي
صدقتي انتي؟! عارفك وحافظك نفس الكابوس ملازمك ليلاتي
باستني أشوفك في الزيارة فتأكديلي إني لسه عايش
نفسي ألمسك أحضنك وسلك وحديد مابينّا حايش
تخيلي
بقيت أشوفك في زيارة ميري وحرس مراقبة السلام مابينّا
وكل مرة أول لقانا نفضل نداري الدموع في عينّا
حتي الدموع ماليها وقت .. هي دقايق وياخدوني منك
طمنيني عليكي وعليهم قولي بسرعة المهم عندك
وانا كمان عايز أقول لك كلام كتير وخايف أنسي
طاروا الدقايق مالحقت أقول لك وانتي كمان مالحقتي لسه
نهاية الزيارة زي بدايتها نداري الدموع واحنا بنبعد
بوسة في الهوا ويا ابتسامة يمكن تطمن قلبك وتسند
هارجع لقبري واستني عيدك لما يجيني
مش يأس عايزك تطمني وانتي كمان تطمنيني
لازم في يوم تقوم القيامة وكابوسنا يخلص
وبدل الزيارة القبر يفتح وفي حضنك أُبعث
مارس ٢٠٢١ - طرة
https://soundcloud.app.goo.gl/Mh5Tf