اعتذارات متأخرة - اعتذار رقم ٢: آسف يا أمي
سألوني عن أمي رديت بتنهيدة
أصل الكلام عَ الأم محتاج لغة جديدة
حلو الكلام كله اتحط في أغاني
تتغني يوم واحد وتتنسي تاني
واتسمي يوم عيدها والكل فيه يتلم
وكل من هبت يتقال عليها أم
مع إنها نسيت تربي عَ الأخلاق
المدرسة قفلت فين طيب الأعراق
آسف يا أمي
آسف يا أمي عشان حطوكي في الليستة
مع أمهات تانية أخدوا اللقب غلطة
شالوا الجنين جواهم كأنهم شنطة
فضوها واتصوروا وخلاص خدوا اللقطة
واحدة غرضها كان تكيد اللي ماتتسمي
والتانية عشان تربطه فتزود اللمة
تصوري يا أمي
ده في أمهات تاكل وتسيب عيالها جعانة
علي عكس فطرتها
وأمهات بتنام وعيالها عيانة
طب فين غريزتها
ضربوا الأمومة في مقتل لا فطرة ولا غريزة
دي الأم اللي ربي ذكرها صبحت جوهرة عزيزة
أما انتي يا أمي ما في كلام يكفيكي
بيكفي نبض القلب لما بفكر فيكي
يحتفلوا همَّ يوم وانا باحتفل طول وقتي
حتي في عز النوم عمرك ما فارقتي
وأطمنك يا أمي عمره ما راح تعبك
ربيتي وعملتي صورة تمام شبهك
ماشية علي نهجك أم بصحيح مش عيرة
صالح يا أمي عملك وجايزته كبيرة
ده في كل سجدة دعاء مِ القلب طالع ليكي
عيالك تملي في سيرتك متشرفين بيكي
يناير ٢٠٢١ - طرة
https://soundcloud.com/bassems/5lrigbikvvxf